अभिनेत्री स्वस्तिमा खड्काको मुख्य भूमिका रहेको नेपाली फिल्म ‘लालीबजार’ले प्रदर्शनको दुई सातामै ५ करोड २५ लाख रुपैयाँ कमाइ गरेको छ।

गत वैशाख २५ गतेदेखि देशभर प्रदर्शनमा आएको फिल्मले जेठ ७ गते बेलुकासम्म उक्त कमाइ गरेको निर्माण कम्पनीले जनाएको हो।

फिल्म निर्माण कम्पनी षट्कोण आट्सका प्रमुख तथा निर्माता म्याक्स दीपेश खत्रीले फिल्मको व्यापार उत्साहजनक रहेको बताए। उनका अनुसार तेस्रो सातामा पनि राम्रो ‘शो’ संख्या पाएकाले आगामी दिनमा कमाइ अझ बढ्ने अपेक्षा गरिएको छ।

निर्माता खत्रीले दर्शकबाट प्राप्त साथ र प्रतिक्रियाले टोली उत्साहित बनेको बताए। उनले मनोरञ्जनसँगै शिक्षाको महत्व र समाजमा त्यसले पार्ने प्रभावलाई फिल्ममार्फत प्रस्तुत गर्न खोजिएको उल्लेख गरे।

फिल्मकी मुख्य अभिनेत्री स्वस्तिमा खड्काले दर्शकले फिल्मको सन्देश र विषयवस्तु सकारात्मक रूपमा ग्रहण गरेको बताइन्।

उनले देशका विभिन्न सहरमा पुगेर दर्शकसँग प्रतिक्रिया लिँदा अधिकांशले फिल्मको कथा, निर्देशन र अभिनयको प्रशंसा गरेको जानकारी दिइन्।

फिल्ममा रविन्द्रसिंह बानियाँ, समाइरा थापा, मुकुन्दकुमार श्रेष्ठ, अभय बराल, विशाल देवकोटा र प्रशंसा सुवेदीलगायत कलाकारको अभिनय रहेको छ।